Бир вакъытлары Ислам уммети, бизим эдждадларымыз, юксек бир дереджеде эдилер.

Бир вакъытлары, Ислам уммети, бирлик ве бераберлик ичинде эдилер.

Ислам тарихинда ойле бир вакъытлар олды ки, «Дюнья узеринде олгъан бутюн умметлернинъ арасында энъ кучьлю уммет кимдир?» - деп сорагъанында: ИСЛАМ УММЕТИ деп джевап берер эдилер.

«Дюнья узеринде олгъан девлетлернинъ арасында энъ кучьлю девлет насыл бир девлеттир?» - деп сорагъанында, сагъа, «ИСЛАМ ДЕВЛЕТИДИР» деп джевап берер эдилер.

Чюнки о вакъытлары, Ислам умметининъ озь девлети бар эди, ве бу Ислам девлети ичинде, Мусульманлар, Аллахнынъ бутюн къанунларына боюн эгип, Аллахнынъ бутюн эмирлерини ерине кетирип яшай эдилер. Пейгъамберимизнинъ костерген ёлундан, чызгъан чызгъысындан четке чыкъмаз эдилер. Юреклеринде Аллах къоркъусы бар эди, макъсадлары Алемлернинъ Раббиси олгъан Аллах Субханеху ве Таалянынъ разылыгъыны къазанмакъ эди. Тюшюнджелеринде Ахирет кунюни ич бир вакъыт акъылдан чыкъармаз эдилер. Харам сайылгъан арекетлерге ёл бермез эдилер, даима яхшылыкъкъа чагъыра эдилер, Ислам динине давет эте эдилер.

Ве бу акъта Раббимиз Аллах с.т. Къурани Керимде бойле буюра:

كُنتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ

وَتَنْهَوْنَ عَنِ الْمُنكَرِ وَتُؤْمِنُونَ بِاللّهِ

Сизлер инсанлар огюне чыкъарылгъан энъ хайырлы уммет эдинъиз. Сизлер эйликни эмир этип, феналыкъны (харам сайилгъан амеллерны) ясакълай эдинъиз. Ве Аллахкъа иман эттинъыз. деп буюрды Раббимиз.

Амма урьметли мусульманлар!!!
1924джи сенесинден берли, яни Ислам девлети йыкъылгъанындан берли, дунья узериндеки мусульманлар пек зорлукъкъа къалдылар. Имансызлар мусульманларгъа къаршы пек шиддетли шекильде уруш алып бардылар, озьлерининъ бутюн хиянетлигини мусульманларнынъ узерине тёктилер.
Ве имансызлар мусульманларгъа къаршы кене гъайрыдан аякъкъа турмасынлар деген макъсадынен гедже куньдюз чалышмакъталар.

Мусульманларны бирлештирген ве аякъкъа котерген Ислам дининден, Ислам медениетинден узакълаштырмакъ ниетинен иш алып бармакъталар, ве бу арекетлери бу куньлерге къадар девам этмектедир.

Ве бойледже мусульманлар, Ислам тюшюнджесине коре дегиль де, имансызларнынъ тюшюнджелери киби тюшюнмеге башладылар. Ислам медениетини дегиль де, имансызларнынъ медениетини озь медениети оларакъ къабул этмектелер, озьлери бильмегенлери алда имансызларнынъ байрамларыны озь байрамлары киби кутьмектелер.

Бу шейлерни анълаткъаным себеби бундаки, якъында 14джи февраль куню олып кечти, имансызлар бу кунни байрам деп  саялар, День Валентина (день влюблённых) деп, имансызлар бу кунни байрам оларакъ къубул этмектелер. Бизимкилер исе, олардан артта къалмайлар, эллеринде чечеклер ве бахшышлар алып озь ярелерининъ янына барып, севги кунюнен хайырламакъталар, бири-биринен байрамлашмакъталар, ама бу кунь ве бу байрам оруспуларнынъ байрамы олгъанындан хаберлери ёкъ.

Ве буны да къошмакъ истейим ки, урьметли мусульманлар, бир къач куньден сонъ 23джи февраль якъынлаша, имансызлар бу кунни день советской армии деп, бу кунни байрам оларакъ кечирмектелер, бири-бирини хайырламакъталар ве мен эминим ки, халкъымыз арасындан базылары имансызлардан артта къалмазлар. Бири-бирини  «С празником!» деп хайырларлар. ама  олар бири-бирлерини бу имансыз байрамнен хайырлагъанлары вакъыт тюшюнмейлерми, бу советская армия дегенимиз, совет аскерлери, бизим халкъымызгъа не къадар эзиет кетирди? Эдждадларымызны, къартбаба ве деделеримизни 1944 сенелери, эвсиз, малсыз, мульксиз, тарласыз, къалдырып, бу топракълардан сюргюн эткен ве ольдюрген, совет аскерлери дегиль эдими? Эбет олар эди.  Амма языкълар олсун ки, халкымызнынъ арасында базылыры буны тюшюнмейлер, ве бунынъ фаркъына бармайлар.

Урьметли мусульманлар!
Ислам динимизде, динимизге келишмеген, динимизге уймагъан, имансызлар тарафындан чыкъкъан байрамларны кутьмек ве къайд этмек, бу харамдыр, къаттыен ясакътыр. Ве  бу акъкъында Раббимиз Аллах С.Т. бойле буюра:

يَا أَيُّهَا الَّذِينَ آمَنُواْ لاَ تَتَّخِذُوا الْيَهُودَ وَالنَّصَارَى أَوْلِيَاءَ بَعْضُهُمْ أَوْلِيَاءَ بَعْضٍ وَمَن يَتَوَلَّهُم مِّنْكُمْ فَإِنَّهُ مِنْهُمْ إِنَّ اللّهَ لاَ يَهْدِي الْقَوْمَ الظَّالِمِين

«Эй иман эткенлер, яхуди ве христианларны дост оларакъ къабул этменъизлер. Чюнки олар бирбирининъ достларыдыр. Ичинъизден ким ки, оларны дост оларакъ къабул этсе о да олардан олыр. Шупесиз Аллах, залым бир джемиетке догъру ёлны косьтермез.» деп буюрмакъта.

Ве Пейгъамберимиз с.а.с. эфендимиз озь хадислеринде буюра ки:

مَنْ تَشَبَّهَ بِقَوْمٍ فَهُوَ مِنْهُمْ...
«Ким башкъа бир къавимге (миллетке) ошар исе, о да олардандыр.»

Башкъа бир хадисте:

Ким бир миллетни севсе, оларнен берабер тириледжектир, деп буюрмакъта.

Онынъ ичюн Урьметли мусульманлар!!!
Алемлернинъ Раббиси олгъан Аллах с.т. бизим ичюн, Ислам уммети ичюн эки байрам берди, бири Рамазан байрамы, экинджиси исе, Къурбан байрамыдыр, бу эки байрамдан гъайры Ислам умметинде башкъа байрамлары ёкътыр. Афта байрамы бар, Джума куню, Джума байрамы, амма умумий шекильде, йылда олып кечкен байрамлар бу ялныз Рамазан ве Къурбан байрамыдыр.

Ве бугуньки хутбемни екюнлемек ичюн, Пейгъамберимиз с.а.с эфендимизнинъ хадислеринден бирисини айтып бермекнен битирмек истейим.

Пейгъамберимиз с.а.с эфендимиз Медине шеэрине кельгенинде, о ерде яшагъан халкъ эки байрамны куте эдилер.

Пейгъамберимиз: бу насыл куньлердир деп сорады.
Онъа айттылар ки: бу джахилие девринден къалгъан байрамлардыр. деп джевабыны бердилер.

Пейгъамберимиз айтты ки;  Аллаху Тааля бу эки байрамларынызны даа хайырлы эки байрамнен денъиштирди, бу ораза ве къурбан байрамларыдыр. деди
Аллах джумлемизден разы олсын.

Аллах джумлемизни лянетли шейтаннынъ тузакъларындан къорчаласын.
Аминь…