فَمَنْ شَهِدَ مِنْكُمُ الشَّهْرَ فَلْيَصُمْهُ

Бугуньки куньде бизлер ве аслында умумий мусульманлар, мубарек учь айларнынъ сонъки айы, рамазан айы ичинде олмакътамыз.

Рамазан айы он бир айнынъ султаныдыр.

«Рамазан айынынъ башы – Рахмет, ортасы – магъфирет, сонъу исе – джехеннем азабындан къуртулмакътыр» – деди севгили Пейгъамберимиз.

Рамазан айынынъ энъ буюк хусусиети – оразадыр.

Рамазан оразасыз олмаз. Рамазан айында ораза тутмакъ бу Раббимиз Аллах Субхана ва Таалянынъ эмиридир. Рамазан айында ораза тутмакъ бу фарздыр. Тутсанъ яхшы олур, тутмасанъ ич бир шей олмаз деген шей ёкъ. Рамазан айында ораза тутмакъ бу Аллахнынъ энъ буюк фарзлардан бирисидир. Ислам шартлары беш олса, онунъ бириси оразадыр.

Аллаху Тааля Къуран-и-Керимде буюра:

فَمَنْ شَهِدَ مِنْكُمُ الشَّهْرَ فَلْيَصُمْهُ

«Ким Рамазан айыны растласа ону ораза тумакънен кечирсин».

Даа бир аети-Керимде Аллаху Тааля буюра:

يَا أَيُّهَا الَّذِينَ آمَنُواْ كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِن قَبْلِكُمْ لَعَلَّكُمْ تَتَّقُونَ

Эй иман эткенлер, сизден эвелькилерге ораза тутмакъ фарз олундугъу киби сизлергеде ораза тутмакъ фарздыр. Бельким сизлер Аллахтан къоркъарсынъыз.

Раббимиз Аллаху Таалягъа иман эткен, Расулюллах с.а.с эфендимизге итаат эткен ве ахиретине инангъан инсан Рамазан айыны ораза тутмакъ кечирмели. Рамазан айында ораза туткъан инсангъа Аллаху Тааля озю онунъ севабыны берир, амма ким бу айда ораза тутмаса буюктен буюк бир джезагъа огърар.

Рамазан айы ичерисиндемиз, амма языкъкъи базы инсанлар бунунъ къийметини бильмейлер. Рамазан айыны бош бошуна оразасыз кечирелер, Аллаху Таалянынъ эмирине эхимиет бермейлер.

«Рамазан айынъыз хайырлы олсун, туткъан оразаларынъызны Аллаху Тааля къабул этсин» десенъ «Мен ораза тутып олмайым» дейлер.

«Я не себебтен ораза тутыт олмайсынъыз» деп сорасанъ.

Бириси: «Авасы пек сыджакъ, мен бу авагъа даянып оламайым» – дей.

Экинджиси: «Мен агъыр иште чалышам, мен къуруджылыкънен огърашам, мен бетон къарыштырам, мен штукатурка япам» – деп раза тутмамакъ ичюн мана къыдыра.

Учюнджиси исе: «я ещё к этому не готов» – дей.

Дёртюнджиси: «Мен куньде дёрт-бешкере аш ашайым, мен аш ашамасам олюп къаларым» – деп озь озьлерини алдатмакъталар.

Озьлери, озь аякъларынен джехеннем атешлерине догъру кетмектелер.

Биринджиден, буну пек яхшы бильмек керекмиз. Аллаху Тааля, инсан котерип оламаджагъ, юкню онунъ узерине юклемез.

Къуран-и Керимде

لاَ يُكَلِّفُ اللّهُ نَفْسًا إِلاَّ وُسْعَهَا

Аллах, инсан котерип оламаджагъ, юкню онунъ узерине юклемез.

Демек Аллах бизлер ичюн бир шейни эмир эттими, о эмирни ерине кетирип оладжагъымыз себебинден Аллах Тааля ону бизге эмир этти. Эгер инсанны, бир шейге кучу ве такъаты етмеген олсайды, Аллаху Тааля ону бизлерге эмир этмез эди. Бу бир.

Экинджиден, авасы сыджакъ деймиз, козь алдынызгъа джехеннем атешини кетиринъиз. Джехеннем атеши, дюнья сыджагъындан некъадар буюктир, некъадар шиддетлидир, некъадар якъыджидир. Бу дюньяда сыджагъындан къачмакъ чареси даа бар, салкъын сунен чайкъанарсынъ, салкъын бир ерде отурарсынъ, амма джехеннем атешлери арасында салкъын сув къандан тападжакъсын. Аллах бизлерни о джехеннем атешлеринден къорчаласын.

Учюнджиден, чалышкъан еримиз агъыр деймиз. Къуруджулыкънен огърашамыз, бетон къарыштырамыз, штукатурка япамыз деймиз.

Урьметли мусульманлар, Пейгъамберимиз Мухаммед Мустафа с.а.с эфендимиз, сахабилернен берабер, 40-50 джередже сыджакъ тибинде, джихад эттилер, Бедир савашында иштиракъ эттилер, бетон къарыштырмакъ, штукатурка япмакъ четте турсын. Окълар тюбинде, къылычлар арасында, олюм арасында оразаларыны туттылар, джихад эттилер. Тутмамакъ ичюн мана къыдырмадылар.

Дёртюнджиден, мен буна азыр дегилим деймиз.

Аслында урьметли мусульманлар, ораза тутмакъ ичюн, инсан азырмы яда азыр дегильми буны биз дегиль, буны чокътан Шариат бельгилеп къойды. Ве Шариаткъа коре инсан пишикинлик чагъына кельдими, (Русча айткъанда когда человек достигает половой зрелости на него возлагается все предписание Ислама) о инсан Аллахнынъ эр бир эмирлерини ерине кетирмек керектир. Мен даа азыр дегилим деген сёзлер бу ерге келишмей.

Бешинджиден, «мен аш ашамасам даянып оламайым» дейлер.

Эгер инсан хаста олмаса, бала олмаса, ёлджу олмаса, савлугъы еринде олса, о инсан ичюн куньдюз емек ашамакъ харамдыр. Рамазан айынынъ куньдюз вакъытларында емек ашамакъ, сув ичмек, сигар чекмек, харамдыр. Ве пейгъамберимизнинъ хадислеринде айтылгъанына коре Рамазан айында ашалгъан эр бир локъма, эр бир емек, ахирет кунюнде атешке чевириледжектир ве о атешни ашаджакътыр. Аллах бизлерни бундан къорчаласын.

Онунъ ичюн, Рамазан айынынъ къыйметини билейик, Рамазан айынынъ урметини ве къадырыны билейик, онунъ ичинде олгъан ниметлерден, рахметлерден ве берекетлерден мехрум къалмайыкъ, Рамазан айыны бош бошуна кечирмейик. Рамазан айына багълы олгъан оразаларымызны тутып, намазларымызны къылып, харам арекетлерден узакъ олуп, хелял арекетлерге якъын олмакнен кечирейик.

Аллах джумлемизден разы олсун.

Аллах джумлемизни Рамазан айында ораза туткъанлардан эйлесин. Аминь