Эй, мусульман халкъым!
Къартбабаларымызнынъ топрагъым!
Сизге сыджакъ селямлар ёллайым!
Бугунь-де-бугунь севимли Къырымда яшайым!

Амма языкъ ки Къырымым денъишти…
Эсасен, Ислям динимизнинъ анъламы денъишти!
Аллаhнынъ ибадетлерини арткъа къалдырдыкъ,
Явур Авропагъа адым-адым бастыкъ!

Намаз окъугъан адамларгъа
«отстой» дейлер,
Балаларымызгъа хакъ тербие берген аналаргъа
«комплекс» дейлер.

Къырымтатар мусульман къызларымыз
къыскъа урбалар кийип,
«мода» айталар,
Харам ичип, пис ерлерде юрип,
Яшларымыз
Озь яшайышнен яшайлар.

Къанда бакъсан пара къазанмакъ ичюн
Ялангъа даламыз,
Юксек эвлер къурмакъ ичюн,
Ибадетлеримизни къалдырып, базарда яшаймыз.

Эй, Аллаhым, не олды бизге?
Санки, дерсинъ, дюнья къарышты!
Мухаммад Пейгъамберимиз бизге,
Догъру ёлунъы косьтермек тырышты!

Севимли мусульман халкъым!
Келинъ, янъыдан озь динимизни
юксек севиеге котерейик,
Дюньяда динъ къардашларымызны
Къыйынлыкъларда къалдырмайыкъ!
Динимизге къаршы олгъан байрамлар кечирильмесин,
Мукъаддес Къуранымыз эвлеримизде файдасыз асылмасынъ!
Анда олгъан къанунлар боюнджа яшайыкъ!

Къуру отьмек олса да,
Бинълернен шукюрлер айтайыкъ,
Бу дюньяда уфачыкъ эвлерде яшасакъ да,
О бир дюньяда сарайлар къурайыкъ!

Аллаh разысынъы ялварып,
Яшайыш китабларамызны савабларнен толдырайыкъ!
АМИНЬ!

Эльвира Джеппарова